Rabotniçki ka shënuar një ndër fitoret më të thella në ndeshjen evropiane, pasi sot mundi ekipin nga San Marino të Tre Pene me rezultatin e thellë 6:0. Është kjo pa dyshim fitorja më e thellë ndonjëherë e arritur nga një skuadër përfaqësuesese e Maqedonisë, edhe pse përballë “romantikët” kishin një skuadër tepër modeste, të cilën e kishin mundur edhe në ndeshjen e parë në transfertë, mirëpo me vetëm një gol, të shënuar nga Mitrev në minutën e fundit të takimit.
Ndryshe sa i përket takimit kthyes në Shkup, të zhvilluar në kompleksin afër FFM-së, serinë e golave ndaj ekipit nga San Marino e nisi futbollisti shqiptarë, Suad Sahiti që realizoi në minutën e 28-të.
Pasi tij rradha ishte e Bojan Najdenov, i cili shënoi në fundin e pjesës së parë (43’) si dhe pas 14 minutave lojë në pjesën e dytë, kur Rabotniçki pas një ore lojë avansonte me rezultatin 3:0.
Kire Markoski në minutën e 71-të shënoi edhe golin e katërt ndaj Tre Pene, ndërsa dy golat e fundit ishin pjesë e ish sulmuesit të Renovës, Stojanço Velinov, i cili brenda dy minutave jo të plota realizoi dy herë në rrjetën e portierit mysafir, Migani.
Rabotniçki në raundin e dytë eliminatorë të Liga Evropa, pret fituesin nga përballja midis skuadrës nga Ishujt Faroe të Runavik dhe skuadrës bjelloruse të Dinamo Minsk. Në ndeshjen e parë bjellorusët kishin shënuar fitore minimale 2:1, ndërsa në ndeshjen e kthimit, rezultati pas 20 minutave lojë, është ai i fillimit (0:0).
Ndryshe pjesë e fitores së “romantikëve” ndaj Tre Pene, përveç Suad Sahiti, ishin edhe vëllai i tij Emir Sahiti, që në lojë u inkuadrua në minutën e 69-të, duke zëvendësuar Filip Duranskin si dhe Florian Kadriu, i cili në minutën e 79-të zëvendësoi pikërisht golashënuesin e parë të Rabotniçkin në këtë përballje.
