Sot bardhekaltërit kanë lënë pas vete pauzën dimërore, duke u rikthyer me stërvitjen e parë për të shënuar fillimin e fazës përgatitore. Ekipi kishte grumbullimin e parë nën urdhrat e trajnerit Qatip Osmani dhe stafit teknik, për vitin 2020 dhe menjëherë ka nisur realizimin e plan-programit përgatitor.
Dita e parë ishte për testime në formën e fizikut të futbollistëve dhe të gjithë me sukses kaluan fazën e parë, që nesër të vazhdojnë me përgatitje në fitnes sallë.
Skuadra do të vazhdojë me punë deri me 22 janar për tu përgatitur më pas për fazën kryesore që do të zhvillohet në Antalia të Turqisë.
Kryesia e klubit tani më ka filluar të bëjë edhe kontaktet e para me skuadrat që do të jenë në intervalin e njëjtë kohor në Antali, ku edhe do të zhvillohen ndeshje kontrolluese, ndërsa një të tillë skuadra nga Çairi do të zhvillojë në Shkup para nisjes për në tokën turke.
Me ekipin në stërvitjen e parë doli edhe përforcimi i vetëm deri në këto momente, sulmuesi Jakup Berisha, i ardhur nga rradhët e Shkëndijës.
