Lacio humb nga Krotone, Empoli bie në “Serie B” (VIDEO)

Janë zhvilluar sot ndeshjet e javës së fundit në “Serie A”, me ç’rast gjithçka është bërë e ditur rreth skuadrave që do përfaqësojnë Italinë në Evropë,  por edhe ata skuadra që vitin tjetër do të luajnë një kategori të garave më poshtë, njofton “infOSport.mk”.

Skuadra e Thomas Strakoshës, Lacio është  mundur në transfertën ndaj Krotones (3:1), skuadër kjo e cila falë kësaj fitore në fund arriti që të ruajë statusin e skuadrës elitare.

Megjithatë nuk ndodhi kështu edhe me Empolin, skuadër kjo e cila u mund sonte në transfertën ndaj Palermos. Skuadra siciliane mundi 2:1 skuadrën e Frederik Veselit, duke e marrë me vete në “Serie B”, ku vitin tjetër do të luaj edhe Peskara e Ledian Memushajt.

Roma falë fitores së vështirë 3:2 ndaj Xhenoas, në fund u ndal në pozitën e dytë, duke u kualifikuar drejtpërdrejtë në Ligën e Kampionëve, derisa Napoli  një gjë të tillë do të kërkojnë të bëjnë përmes ndeshjeve kualifikuese. Atalanta e Berishës së bashku me Lacion do të luajnë në grupet e Liga Europa, derisa Milani përmes ndeshjete eliminatore do të kërkojë të ju bashkëngjitet Atalantas dhe Lacios në grupet Liga Evropa, ndërkohë Interi që sonte mundi bindshëm 5:2 Udinezen mbetet pa gara evropiane.

Jashtë Europës mbetet edhe Fiorentina që barazoi 2:2 ndaj skuadrës së fundit në tabelë, Peskarës, derisa Torino në një gol shou me rezultatin 5:3 mundi Sasuolon.