Nëse bazohemi në fjalën popullore ‘Dita e mirë shihet që në mëngjes’ atëherë Shkëndija është në rrugë të mbarë për të grumbulluar pjesën më të madhe të trofeve në futbollin e Maqedonisë në gjithë kategoritë.
Tanimë kampionë me ekipin e parë dhe finalistë të Kupës, kuqezinjtë sot kanë bërë të vetët dy trofe në kuadër të Kupës së Maqedonisë për kategori të reja. Suksesit 5:3 në finalen e kadetëve i është bashkuar edhe triumfi i Shkëndijës U19 që bën të vetin trofeun e Kupës në këtë kategori.
Të përforcuar me Arbin Zejnullain dhe Enis Fazllagiçin që tashmë llogariten si pjesë e ekipit senior, por që me moshë kanë të drejtë të paraqiten ende për të rinjtë, juniorët barazuan pa gola pas 90-të minutave me Rabotniçkin, ndërsa ishin më të saktë në ekzekutimin e penaltive ku fituan me shifrat 5:4.
Të pesë ekzekutuesit e Shkëndijës ishin të pagabueshëm (shënuan Fazllagiç, Zejnullai, Luma, Ramadani dhe Aliti), ndërsa në serinë e dytë me pritje vendimtare u shfaq portieri Artan Iljazi që bashkë me realizuesit e penaltive sollën fitoren dhe trofeun e Kupës.
Pas dy finaleve të sotme të fituara nga ekipet U18 dhe U19 dy ditët e ardhshme pasojnë dy finale tjera të ekipeve kuqezi, pasi të mërkurën finale të Kupës luan Shkëndija U16 përballë Rabotniçkit në orën 10:00, ndërsa të enjten Shkëndija U16 përballet me Vardarin. (KF Shkëndija)
| RABOTNIÇKI U19 – SHKËNDIJA U19 0:0 (4:5 penalti) |
| Stadiumi “Burimet e Bilianës” në Ohër |
| Golashënues: / (Fazllagiç, Zejnullai, Luma, Ramadani dhe Aliti me penalti për Shkëndijën) |
| SHKËNDIJA U19: Artan Iljazi, Arlind Aliti, Muharem Mislimi, Enis Fazllagiç, Ylber Beqiri, Ardit Osmani, Ensar Luma, Besart Rexhepi, Alban Rasimi, Arbin Zejnullai, Florent Ramadani. |
| Luajtën edhe: Xhenis Ibraimi dhe Gazmend Loki. |
| Trajner: Bekim Osmani |
