Mbrëmë në Kumanovë u zhvillua ndeshja e xhiros së 21-të në elitën e basketbollit vendor midis KB Kumanovo dhe KB Çair 2030.
Takimi u zhvillua në një atmosferë tejet të tensionuar, ku vazhdimisht dëgjoheshin sharje dhe fyerje me përmbajtje etnike, e që realisht nuk kanë vend në sport.
Si pasojë e fyerjeve dhe sharjeve në baza etnike nga ana e delagatit, u dha urdhër që salla të zbrazet menjëherë. Mirëpo situata eskaloi edhe jashtë parketit, ku pas përfundimit të ndeshjes, tifozët e ekipit të Kumanovës tentuan të vandalizojnë autobusin e klubit shqiptar, duke lënë edhe mbishkrime me përmbajtje nacionaliste dhe fyese.
Lidhur me këtë incident, kanë reaguar nga KB Çair 2030, që dënojnë ashpër këtë sjellje të turpshme nga ana e tifozëve të KB Kumanovo, duke kërkuar që të merren masa të menjëhershme në mënyrë që akte të tilla të mos përsëriten më në arenat tona sportive.
“KB Çair 2030 dënon ashpër këtë sjellje të turpshme dhe antishtetërore. Sporti është vend i respektit, rivalitetit të shëndetshëm dhe bashkimit, e jo i urrejtjes dhe vandalizmit. U bëjmë thirrje organeve kompetente që të ndërmarrin masa të menjëhershme dhe të hetojnë këtë incident, në mënyrë që akte të tilla të mos përsëriten më në arenat tona sportive”, – thuhet mes tjerash në reagimin e klubit të Çairit.
Ndryshe, ndeshja u mbyll me fitoren e KB Kumanovo me rezultatin 97:74.
Pas 21 xhirove KB Çair 2030 me 10 fitore dhe 11 disfata renditet në pozitën e 7-të me 31 pikë, ndërsa KB Kumanovo me 34 pikë renditet në pozitën e katërt. (infOSport.mk)
