Përfaqësuesja e Kosovës në futboll për vajza e ka nisur me sukses edicionin e ri në Ligën e Kombeve. Në kuadër të Grupit 6 në Ligën C, “Dardanet” triumfuan si mysafire në Shkup ndaj Maqedonisë së Veriut, me rezultat bindës 4:0.
Kjo ishte ndeshja e parë e Kosovës nën drejtimin e përzgjedhësit të ri, Sami Sermaxhaj. Vajzat nga Kosova e nisën fuqishëm ndeshjen dhe kaluan në epërsi që në minutën e 6-të, kur Kaltrina Biqkaj shënoi nga brendësia e zonës.
Edhe pas golit, Kosova vazhdoi të dominojë dhe krijoi disa raste të mira shënimi, por pjesa e parë u mbyll me epërsinë minimale 1:0.
Në pjesën e dytë, “Dardanet” u shfaqën edhe më superiore. Pas vetëm katër minutash lojë në këtë pjesë, Kaltrina Biqkaj realizoi golin e dytë personal dhe të ekipit me një gjuajtje nga distanca, duke e çuar rezultatin në 2:0.
Epërsia e përfaqësueses së Kosovës u thellua edhe më tej, kur Gentiana Fetahaj shënoi në minutën e 65-të për 3:0, ndërsa vetëm dy minuta më vonë, Valentina Mehaj vulosi rezultatin përfundimtar 4:0.
Kjo fitore është një sinjal i fortë për ambiciet e vashave të Kosovës në këtë edicion të Ligës së Kombeve për rikthim në Ligën B.
Ndeshjen e radhës, “Dardanet” do ta zhvillojnë më 25 shkurt kundër Letonisë në stadiumin “Fadil Vokrri”, duke filluar nga ora 14:00, ndërsa Maqedonia të njëjtin kundërshtarë në Shkup do ta mirëpret me datë 4 mars.
