Stinori pranveror në elitën e futbollit vendor starton të shtunën me ndeshjen midis Gostivarit dhe Vardarit. Dy skuadrat që edicionin e kaluar ishin pjesë e Ligës së Dytë, tashmë garojnë në mesin e më të mirëve, ndërsa vlen të theksohet se ishin ndër skuadrat më aktive në merkaton e dimrit, shkruan “infOSport.mk”.
Që të dyja prezantuan emra të rinj edhe në ditën e fundit të merkatos (11 shkurt). Gostivari në formë huazimi nga rradhët e Karsyaka solli Berat Kallkan, derisa Vardari prezantoi kroatin Mihael Brishki dhe sulmuesin nga Gambia, Keba Kebel Suso.
Nuk mungoi edhe bashkëpunimi mes këtyre dy skuadrave, ku bie në sy huazimi u Mujezinoviç te Vardari, si dhe transferimi i Nijazi Jusufit në anën e kundërt.
Ndeshja midis Gostivarit dhe Vardarit, është e vetmja e ditës së shtunë, derisa ndeshjet tjera të javës së 19-të në LPFMV, zhvillohen të dielën.
Kampionët e vjeshtës, Struga Trim Lum në Shkup do të përballet me Rabotniçkin, në Çair FC Shkupi do të mirëpret Voska Sport, derisa në lagjen e Gjorçe Petrovit, Makedonija GJ.P do të mirëpret Shkëndijën.
Sileksi në Kratovë do të jetë nikoqir i AP Brera Strumica, ndërsa një ndeshje mjaft interesante pritet të zhvillohet në Shtip midis Bregallnicës dhe Tikveshit.
Që të gjitha ndeshjet e javës së 19-të startojnë në ora 14:00. (infOSport.mk)
