FC Shkupi po vijon përgatitjet në Antalia të Turqisë, aty ku trajneri Mladen Zhizhoviç po provon edhe disa futbollistë të rinj, që mund të jenë përforcimet e duhura për skuadrën nga Çairi për në stinorin pranveror, shkruan ‘infOSport.mk’.
Aktualisht janë tre futbollistë që po testohen nga strategu boshnjak bashkë me stafin e tij.
Mbetet të shihet nëse të njëjtit do të plotësojnë kërkesat e trajnerit dhe do të bëhen pjesë e FC Shkupit, drejtuesit e së cilës skuadër tashmë po mendojnë edhe rikthimin e ish sulmuesit të tyre, Dembo Darboe.
Aktualisht 25-vjeçari nga Gambia është në pronësi të skuadrës së Al Nasr nga Emiratet e Bashkuara. Duke pasur parasysh konkurrencën e madhe te kjo skuadër, ata vitin e kaluar e huazuan te skuadra kazake e FC Astana, ndërsa të njëjtën gjë dëshirojnë ta bëjnë edhe këtë vit.
Informacionet tona flasin se në këtë çështje është angazhuar direkt presidenti i FC Shkupit, Olgun Ajdin, i cili me çdo kusht kërkon rikthimin e sulmuesit Darboe në Shkup, duke besuar se i njëjti mund të ndihmojë skuadrën në arritjen e objektivit, titullin e kampionit.
Kujtojmë, Darboe pjesë e FC Shkupit ishte për gati 18 muaj, duke zhvilluar 42 ndeshje dhe duke realizuar 19 gola.
Vlen të theksohet në veçanti pjesa e parë e edicionit 2020/21, kur i njëjti në 18 ndeshje realizoi 16 gola, duke qenë një ndër më të merituarit për titullin kampion të FC Shkupit, pavarësisht se nuk e zhvilloi edhe pjesën e dytë të atij sezoni.
Një rikthim i Dembo Darboe në Çair, pa dyshim se do të ishte një super lajm për tifozët e FC Shkupit, që njohin kualitetet e sulmuesit nga Gambia, por njëkohësisht do të ishte edhe një sihariq për Ligën e Parë të Maqedonisë në përgjithësi. (infOSport.mk)
