Valmir Nafiu edhe përfundimisht ka ndarë rrugët me skuadrën e Gjilanit nga elita e futbollit kosovar, duke rezultuar në këtë mënyrë si futbollistë i lirë, njofton “infOSport.mk”.
Nafiu skuadrës së Gjilanit iu bashkua shtatorin e vitit 2023, pas një eksperiencë të shkurtër që pati në futbollin sllovak me skuadrën e Koshice. Ai me Gjilanin në Superligën e Kosovës zhvilloi 12 ndeshje, duke bërë edhe 2 asistime, ndërsa tashmë i njëjti kërkon të provojë veten sërish jashtë Maqedonisë.
Ndryshe Nafiu është një fëmijë i Shkëndijës, i cili që në moshën 18-vjecare ishte transferuar te Bazeli, që më pas të bëjë karrierë ndërkombëtare edhe te skuadra gjermane e Hamburgut, te APOEL Nikozia në Qipro si dhe te Skënderbeu në Shqipëri, ndërsa në futbollin vendor kishte provuar veten edhe me Renovën.
Nafiu në Ligën e Parë të Maqedonisë, numëron plotë 186 ndeshje, duke regjistruar njëkohësisht edhe 24 gola dhe 30 asistime.
Me fanellën e Shkëndijës i njëjti numëron 144 ndeshje dhe 15 gola të shënuar si dhe tre tituj kampion. Kur jemi tek titujt, vlen të theksohet se i njëjti një gjë të tillë kishte bërë edhe me Skënderbeun në Shqipëri si dhe me APOEL Nikozia në Qipro, me të cilën skuadër gjithashtu kishte fituar edhe trofeun e Kupës, ndërsa së fundmi me Koshicen ishte shpallur kampion në Ligën e Dytë sllovake. (infOSport.mk)
