Në prag të ndeshjes së parë të raundit të dytë të Ligës së Konferencës, që FC Shkupi do ta zhvillojë kundër skuadrës së njohur bullgare të Levski Sofjes, para mediave nga tabori i skuadrës nga Çairi, folën trajneri Xhihat Arsllan dhe mesfushori, Ali Adem.
“Sigurisht që Levski është një kundërshtar më serioz, se ai që kishim më parë. Është një ndeshje e re dhe duhet një strategji e re. I gjithë koncepti i ndeshjes ndryshon dhe natyrshëm përgatitemi duke pasur parasysh kundërshtarin. Levski është një ekip serioz, ka vite që është pjesë e garave evropiane. Ata luajnë futboll sulmues dhe kanë lojtarë të tillë. Ne treguam gjithashtu dobësi dhe duhet ta rregullojmë këtë. Do të mundohemi të jemi më kreativë” – u shpreh fillimisht trajneri Arsllan, i cili shtoi se çdo rezultat, duke shtuar këtu edhe fitoren, për FC Shkupin do të ishte rezultat pozitiv.
Arsllan më tej foli me superlativa për skuadrën kundërshtare, mirëpo njëkohësisht i njëjti tha se skuadra e tij është gati për të arritut diçka, që deri më tani nuk e kishin arritur.
“Ekipi ynë luan futboll teknik, dhe kjo është gjithmonë e vështirë për t’u arritur në fushë, sidomos ndaj një kundërshtari cilësor. Kur fiton 5:0, ke më shumë stres se sa gëzim. Sepse është e vështirë të pajtohesh me faktin se ke fituar me rezultat kaq të lartë. Ne bëmë histori me atë rezultat, por është vetëm një arritje dhe ne po ecim përpara. Levski është një klub me histori, që ka një ekip me moshë te re, me mesataren prej 23 vjet. Portieri është vetëm 18 vjeç dhe tashmë ka një çmim prej 1.5 milionë euro. Edhe ne kemi ekipin e ri, pasi që më parë ishim me mesatare 28 dhe tani jemi 24. Me punë të palodhur mendoj se do të arrijmë diçka që nuk është arritur. Synimi im nuk janë vetëm ata njëmbëdhjetëshe të parët që do të performojnë, por edhe ata që do të marrin gjysmë orë për të dhënë maksimumin e tyre“ tha mes tjerash trajneri Arslan, i cili gjithashtu shfrytëzoi rastin për të ftuar të gjithë futbolldashësit që në numër sa më të madh të vijnë në stadium dhe të përcjellin ndeshjen, duke ndihmuar skuadrën me anim korrekt.
“Pas duelit me Hegelmanin të gjithë jemi të fokusuar në këtë ndeshje. Me ndihmën e tifozëve shpresojmë në një rezultat të favorshëm. Ky ekip i Shkupit është i aftë për shumë arritje dhe këtë do ta dëshmojmë në ndeshjen e nesërme”, – u shpreh mesfushori Ali Adem.
Ndeshja midis FC Shkupit dhe Levskit zhvillohet të enjtën (27.07.2023) në stadiumin “Todor Proeski” në Shkup, me fillim në ora 21:00. (infOSport.mk)
