Shkëndija e Tetovës bie në sy të tifozëve polak gjatë fazës përgatitore në Antalia të Turqisë. Kampionia e Maqedonisë së Veriut në ndeshje kontrolluese fillimisht mundi 4:1 Piast Gliwice, dhe më pas 3:1 edhe Warta Poznań. Vrasësi i ekipeve tona (shkruan mediumi nga Polonia) në këto ndeshje ishte Dashmir Elezi, autor i treg golave nga shtatë sa shënoi Shkëndija.
Linku: https://weszlo.com/2022/01/26/dashmir-elezi-shkendija-szkendija-tetovo-sylwetka
Por, pse po i kushtojmë vëmendje këtij futbollisti?
Sepse talenti 17-të vjeçar nga Tetova ishte përfshirë si një prej 60-të talentëve më të mirë në botë për vitin e shkuar. Në Turqi, ne (mediumi polak) kishim rastin të njihemi me futbollistin dhe klubin e tij që vite më parë kishte eliminuar Cracovia-n nga UEFA Europa League.
“Dashi! Ky është një vrasës! – shprehej një anëtar i stafit teknik të Shkëndijës, pas golit të Elezit kundër Warta Poznań. Sulmuesi realizoi pas një krosimi nga e djathta kur ishte preciz me goditje nga ajri (vole). Në ndeshjen kundër Piast, 17-të vjeçari shfaqi një pjesë të repertoarit të tij: ai fitoi duelin e shpejtësisë me mbrojtësin, kaloi portierin dhe e mposhti Jakub Szmatuła-n me goditje precize me këmbën e majtë. Pak minuta më vonë, ai poashtu mori përgjegjësinë për të ekzekutuar me shumë siguri një penalti.
Ekipet polake u bindën shpejt dhe me dhimbje për shkathtësitë e tij. Por në rastin e Dashmir Elezit, praktikisht gjithçka ndodh me këtë ritëm.
Dashmir Elezi….Kush është talenti më i madh i futbollit në Maqedoni?
Elezi ishte 14 vjeç kur debutoi për përfaqësuesen U17 të Maqedonisë. Skauti Jacek Kulig, i cili më vonë e ndoqi karrierën e tij dhe përgatiti raporte për të, na thotë se fillimisht nuk mund ta gjente në asnjë bazë të dhënash statistikore. Në WyScout, InStat – nuk kishte asnjë gjurmë të Dashmirit, megjithëse ai vetë shënoi menjëherë praninë e tij në fushë, duke u dalluar nga bashkëlojtarët e tij. Kështu që ishte e vështirë të mblidheshin të dhëna për të, por nuk zgjati shumë. Menjëherë pas kësaj, djali nga Tetova ishte në ekipin e parë të Shkëndijës.
– Gjithmonë më pëlqente të luaja futboll, po gërmonim në oborr me shokët e mi. Në moshën 9-10 vjeçare u futa në akademinë e Shkëndijës së Tetovës. Në moshën 14-vjeçare kam debutuar në ekipin e parë, në një ndeshje miqësore me Prishtinën dhe në të njejtën kam shënuar gol. Një vit më vonë, firmosa një kontratë me klubin dhe fillova të stërvitem rregullisht me ekipin e parë. Kur isha 16 vjeç dhe 1 ditë debutova në ligë dhe shënova kundër Shkupit, nënkampion i ligës. Në të njejtën ditë mora dy rekorde, “debutuesi më i ri” dhe “golashënuesi më i ri” në historinë e ligës maqedonase – na tregon Dashmir Elezi.
Një figurë e rëndësishme në rrugën e talentit tetovarë ishte Erhan Selimi. Ai është asistent i trajnerit aktual, Bruno Akrapoviç, por më parë Selimi ka qenë drejtor i akademisë së Shkëndijës për vite me radhë. Ishte ai që u kujdes për zhvillimin e Dashmirit dhe e dërgoi 14-vjeçarin në stërvitjen e ekipit të parë. Akademia siguroi gjithashtu që Elezi të kishte kushte për zhvillim që i përgjigjeshin shkallës së talentit të tij.
– Në akademinë e Shkëndijës kam punuar me një trajner personal, kemi përmirësuar teknikën. Tani, kur dua të bëj diçka shtesë, flas me stafin dhe organizoj trajnime shtesë. Kam filluar të punoj edhe me karakteristikat mendore, një ose dy herë në javë kam seanca te psikologu – shpjegon lojtari 17-vjeçar.
Dëgjojmë se një talent në adoleshencë bie në sy edhe në përgatitjen fizike. Ai ka rezultatet më të mira në skuadër. Për sa i përket yndyrës së trupit (indit dhjamor), është perfekt, ashtu si lojtarët e nivelit të lartë. Përveç futbollit, Elezi kujdeset edhe për arsimin. Ai di anglisht, flasim pa problem (shkruan gazetari polak). Megjithatë, ai vetë ka një tjetër lëndë të preferuar.
– Më pëlqen më shumë historia. Më pëlqen të njoh të shkuarën e vendit tonë, më pëlqen ta mësoj – shpjegon ai.
Të jem si Cristiano Ronaldo!
Dashmir Elezi nuk e ka problem të tregojë të preferuarin e tij.
– Lojtari im i preferuar është Cristiano Ronaldo. Ai është një titan i punës, më pëlqen qasja dhe karakteri i tij. Edhe unë e kam mentalitetin e fituesit, dua ta imitoj – thotë futbollisti i klubit nga Tetova.
Dashi nuk e ka takuar ende CR7, sigurisht jo në fushë. Por Elezi na tregon për një tjetër lojtar që i bën përshtypje.
– Edhe unë e kam pasur lojtarin e preferuar në Maqedoni: është Ferhan Hasani. Kur isha i vogël ai luante për Shkëndijën me numrin 10, ishte kapiten i ekipit. Tani është rikthyer në klub, kështu që kemi mundësi të luajmë së bashku – shpjegon ai, ndërsa kujtojmë foton nga ndeshja me Wartën, kur Elezi dhe Hasani festuan së bashku një gol për ekipin e tyre.
Mesfushori sulmues 31-vjeçar, i cili u rikthye në vendlindje gjatë merkatos së dimrit, në fakt mund të jetë shembull për më të rinjtë. Si Elezi, edhe ai vjen nga Tetova dhe është rritur në Akademinë e Shkëndijës. Më pas shkoi në Gjermani, luajti edhe në Danimarkë dhe Arabinë Saudite. Dashmiri duhet të punojë për të arritur edhe më shumë.
– Sot nuk është e lehtë të arrish që lojtarë të lindur pas vitit 2000, t’i bësh të interesohen më shumë, t’i motivosh, të ruash përqendrimin dhe vëmendjen e tyre. Shumë prej tyre flasin për të preferuarit e tyre, Cristiano Ronaldon, por jo të gjithë duan të punojnë si ata. Nuk po flas për Dashmirin, sepse ai ka shumë vullnet për të punuar. Sigurisht që dua ta motivoj dhe të kërkoj stimuj të rinj për të. Që pas një ndeshjeje të mirë të mos mjaftohet me të, por të mendojë për ndeshjen e radhës dhe si të jetë edhe më i mirë. Unë e kërkoj këtë, duke pasur një mentalitet që më bën vazhdimisht të dëshiroj të arrij gjithnjë e më shumë – shpjegon Bruno Akrapoviç.
Trajneri i Shkëndijës thotë se po mundohet ta prezantojë me mjeshtëri futbollistin e ri në ekip. Dashmir Elezi nuk po luan nga kopertina në kopertinë, është herët për t’i dhënë përgjegjësi për paraqitjen e skuadrës.
– Shpresoj që të bie në sy dhe të bëjë një karrierë të madhe. Për momentin ka nevojë për stabilitet gjatë gjithë sezonit. Kjo, natyrisht, nuk është e lehtë, sepse ai është ende 17 vjeç. Ndonjëherë njerëzit presin shumë prej tij, duke harruar se ai është një lojtar shumë i ri. Ai ka ende nevojë për ndihmën e bashkëlojtarëve, trajnerëve, për të kaluar gradualisht në një nivel tjetër.
Në të njëjtën kohë, shihet se ky nuk është një djalë i rastësishëm. Shokët e skuadrës nuk kanë frikë t’ia pasojnë topin në fushë, ai vetë kthehet prapa me dëshirë dhe kërkon të luajnë me të, edhe atëherë kur ka një kundërshtar pas shpine. Në ndeshjen ndaj Warta Poznań, Elezi u përball me mjaft sfida. Fjalë për fjale, sepse ai luajti me rival David Malembanën e testuar, d.m.th., një mbrojtës i fortë, dy metra. Por shumë shpejt doli se ishte futbollisti nga Mozambiku që kishte problem, pasi i riu nuk do të kishte problem. Një herë ai e shmangu atë me shumë klas me një lëvizije të zgjuar të trupit kur po pranonte topin.
– Ai gjithmonë gjen një mënyrë për t’u marrë me kundërshtarin e tij. Edhe nëse ai e dominon atë në aspekt fizik të trupit. Kur përballet me një mbrojtës shtatlartë, e sfidon me lojën në tokë. Driblimi dhe gjetja e zgjidhjeve në hapësira të vogla – këto janë avantazhet e tij të mëdha. Ai është gjithashtu i shkëlqyeshëm në parashikimin e asaj që do të ndodhë në fushë. Është pothuajse e rrallë për moshën që ka. Stili që ne luajmë është shumë i mirë për të. Një lojë me pasime dhe me një ose dy kontakte me topin për të hyrë në zonën e fundit, duke sulmuar hapësirat e hapura. Në ndeshjet kontrolluese në Turqi shihet se forma e tij po rritet – thotë Akrapoviç.
Bruno Akrapović, ose miku i Klopp. Si luan Shkëndija e Tetovës?
Një rast interesant është edhe trajneri i Shkëndijës së Tetovës. Akrapoviç ka punuar më parë për këtë klub, duke fituar Kupën e Maqedonisë me kuqezinjtë në vitin 2016. Ai ishte timonier i skuadrës tetovare kur e mposhtën dy herë në Evropë, Krakovian. Ai ishte i suksesshëm edhe në Bullgari, por karriera e tij futbollistike është edhe më interesante. Për vite me radhë ai ndante zhveshtore me Jurgen Klopp, të cilin e takoi në Mainz. Aty u formua trajneri Akrapoviç.
– Së bashku me Jurgen Klopp, kam luajtur në Mainz nën drejtimin e Josip Kuze dhe Wolfgang Frank. I pari pëlqente futbollin vertikal, i dyti ishte trajneri i parë në Gjermani që hoqi dorë nga libero dhe luajti me katër mbrojtës. Ne kemi mësuar prej tyre, kemi nxjerrë modele prej tyre. Mundohem ta kombinoj dhe t’i lë lojtarët të luajnë futboll. Padyshim që varet nga cilësia e lojtarëve që keni në skuadrën tuaj, por ju mund të organizoni programin tuaj të stërvitjes në mënyrë që ata të zhvillojnë dhe të rrënjosin tek ata vullnetin për të zhvilluar veten e tyre – na thotë trajneri boshnjak.
Mundëm të shohim se Shkëndija u shkaktoi probleme të mëdha skuadrave polake. Sigurisht, nuk është një diferencë e madhe në cilësi, por presioni i lartë, loja agresive dhe Elezi që s’ndalej nga mbrojtësit i lejojnë Shkëndijës të kontrollojë situatën në fushë. Pra pyesim për specifikat e stilit të skuadrës nga Tetova.
– Kur bëja licencën UEFA PRO, tema e punës sime ishte “futbolli i së ardhmes”. Kam shkruar se si mund të duket: duele në fushë të plotë, futboll agresiv në gjysmën e kundërshtarit, presing, kundërpresing. Kjo është ajo që po përpiqem të bëj tani. Kur humbasim topin, unë dua të shoh presionin, shtypjen. Këtë ua shpjegoj lojtarëve gjatë stërvitjes, është një çështje kyçe. Duhet të jeni të organizuar mirë, falë kundërpresionit të mirë nuk keni pse të vraponi gjatë. Kur Barcelona po kalonte momentet e saj më të mira, të gjithë i kushtonin vëmendje cilësisë së lojtarëve individualë. Por ata ishin të organizuar në mënyrë të shkëlqyer në kundërpresion, gjë që siguroi suksesin e tyre. Varet nga cilësia, nga ajo se sa shpejt lojtarët do ta kuptojnë atë dhe do të jenë në gjendje të përsërisin atë që bëjnë në stërvitje, gjatë ndeshjes. Kjo është gjëja më e rëndësishme për mua: transferimi i stërvitjeve në ndeshje. Vendosja ime është zakonisht 4-3-3, por tani po luajmë 3-5-2. Erdha vonë në gusht pasi klubi u eliminua nga Evropa dhe kishim një fillim të keq të sezonit. E pashë ekipin pa motivim, kështu që nuk ishte e lehtë t’i merrja dhe të fusja diçka të re. Ndryshova natyrën e skuadrës, në ndeshjet e fundit mund të shihet një përmirësim i qartë– shpjegon Akrapoviç.
– Më duhet fleksibiliteti i tij, falë të cilit ai përshtatet me situata të ndryshme në fushë. Kur një rival ka ndonjë problem, ne duhet t’i kthejmë ato në një avantazh për ne. Dashmiri është i zoti në këtë, ai mund t’i shohë këto gjëra dhe të përfitojë prej tyre. Në Maqedoni kemi një rregull që kërkon të luajmë me një lojtar të ri (nën 21 vjeç) në çdo ndeshje. Ai do të jetë zgjedhja e parë për të zbatuar këtë rregull, jo vetëm për shkak të moshës së tij, por edhe sepse ndihmon ekipin në fushë – shton ai i pyetur për rolin e Elezit në këtë sistem.
Dashmir Elezi – një armë universale në ofensivë
Fleksibiliteti i Dashmir Elezit nuk ka të bëjë vetëm me mënyrën sesi ai i trajton rivalët në fushë. Ai është një lojtar që mund të luajë praktikisht në çdo pozicion në sulm, gjë që e bën atë një talent edhe më interesant.
“Ai mban numrin nëntë, por është më i mirë në krahë dhe mund të veprojë edhe si sulmues i dytë. Luan me të dyja këmbët, i shpejtë, i shkathët dhe inteligjent, gjithashtu pa top, lojtari luan një rol shumë të rëndësishëm në sulm, duke sulmuar nga thellësia ose duke prerë nga brenda”, – shkruante për të Guardian, duke përshkruar një nga 60 lojtarët më të mirë në botë të lindur në vitin 2004. Në të njëjtën listë, ishin të përfshirë lojtarë si Gavi i Barcelonës, Youssoufa Moukoko dhe polaku Kacper Urbański.
– Pozicioni im i preferuar është “nëntë”, por nuk ka shumë rëndësi sepse mund të luaj role të ndryshme sulmuese. Në krahë apo si numër “10”, çfarëdoqoftë. Për mendimin tim, pikat e mia më të forta janë driblimi, hyrja në hapësira të lira dhe efektiviteti para portës kundërshtare. Unë punoj më së shumti në këtë të fundit. Do të doja të shënoja edhe më shumë gola – ky është mendimi i Elezit për veteveten.
Bruno Akrapoviç e futi në fushë si një nga dy sulmuesit. Në pjesën e dytë të ndeshjes me Warta Poznań, ai u shoqërua përpara nga një lojtar shumë më i madh në moshë dhe më i fortë, ndaj një dyshe e tillë e plotësonin mirë njëri-tjetrin. Elezi ishte i etur për të ulur topin dhe në kundërsulme priste një pasim që do t’i lejonte të garonte kundër mbrojtësve. Jacek Kulig e krahasoi atë me Diogo Jota. Akrapoviç na tregon për një tjetër lojtar të klasit botëror.
– Më kujton Sergio Agueron. Në mënyrën se si lëviz, si e merr topin. Ndalon dhe lëviz me një ritëm. Në moshën e tij, kjo nuk është shumë e zakonshme. Kjo është arsyeja pse stili i tij më kujton shumë Agueron. Mendoj se ky është talenti më i madh që kam parë ndonjëherë. Unë jam një trajner i ri për të, përpiqem t’i mësoj gjëra të reja nga shkollat gjermane dhe italiane, të cilat i ndjek. Nëse punon si tani, sidomos gjatë muajit të kaluar, do të jetë e vështirë ta mbajmë në klubin tonë për një kohë të gjatë – thotë trajneri i Shkëndijës së Tetovës.
Sigurisht, kjo nuk do të thotë se Dashmir Elezi tashmë po luan në nivelin e yllit të njohur argjentinas. Mirëpo, nuk mund t’i mohohet fakti që ai nuk shfaq asnjë stres, pavarësisht nga rivali. Qëllimi i tij është i thjeshtë: gjuaj dhe fito. Futbollisti i ri na tregon foton e tij të parë në Instagram, pesë vite më parë. Trajneri i akademisë së Shkëndijës e ngushëllon Dashmirin që qante – pasi skuadra e tij kishte humbur. Në fotot e mëposhtme, megjithatë, shihet kryesisht gëzimi. Edhe nga titulli i parë me ekipin senior, në të cilin Elezi ka kontribuar me gola kundër nënkampionit (Shkupit) dhe Makedonija Gj.P. (Vendi i katërt në ligë). Këto janë ndeshjet më të rëndësishme që ai ka luajtur deri më tani.
Sulmuesi nga Tetova ka edhe kontaktin e parë me përfaqësuesen A të Maqedonisë së Veriut. Gjatë pandemisë, seleskionuesi testoi lojtarët nga liga vendase të cilët mund të zëvendësonin lojtarë që do të ndaloheshin nga klubet të merrnin pjesë në një ndeshje të ekipit përfaqësues.
– Maqedonia ka një përfaqësuese gjithnjë e më të fortë. Ne tashmë mund të konkurrojmë me rivalë të fortë. Isha në kampin stërvitor të përfaqësueses për tre ditë, ishte e mrekullueshme të stërvitesha me lojtarët që më vonë luajtën në EURO 2020 – na tregon Elezi.
Shkëndija Tetovë. Si është klubi dhe akademia më e mirë në Maqedoni?
Dashmir Elezi dhe rruga e tij drejt një karriere të madhe janë të lidhura pazgjidhshmërisht me akademinë e Shkëndijës së Tetovës. Tihomir Kostadinov tashmë na ka treguar për zhvillimin e futbollit vendas. Shkëndija është padyshim klubi më i madh në Maqedoninë e Veriut. Një klub me një buxhet rreth 4 milionë, i mbështetur nga një sponsor i fuqishëm – Ecolog International. Ndoshta nuk na bën përshtypje, por aty nënkupton mundësinë e dominimit të rivalëve të ligës. Dhe gjithashtu edhe te kategoritë e reja. Pra shikojmë prapaskenat e funksionimit të këtij klubi.
– Akademia e Shkëndijës së Tetovës po rritet, ne ende mund të përmirësojmë shumë gjëra. Në rajonin tonë, në Maqedoni, Shqipëri dhe Kosovë, ka shumë lojtarë me potencial që mund të kalojnë në një nivel të lartë. Ne duhet të jemi më të mirë për t’i gjetur këta lojtarë dhe për t’i sjellë ata tek ne në momentin e duhur. Kur isha këtu për herë të parë, u përpoqa ta prezantoj këtë strategji, thotë Bruno Akrapoviq, i cili ka një histori interesante për një tjetër talent të madh në futbollin maqedonas.
– I kërkova klubit të interesohej për Eljif Elmas. Ne patëm një shans ta sillnim tek ne, mund ta përballonim, ai ishte atëherë 17 vjeç, ashtu si Dashmiri tani. Më pas Elmas shkoi te Fenerbahçe, më pas te Napoli. Duhet të sigurohemi që të mos bëjmë më shumë gabime të tilla – beson trajneri boshnjak.
Shkëndija e Tetovës ka një terren stërvitor me bar natyral dhe një terren të dytë që e përdorin me bar artificial. Ata gjithashtu kanë një terren stërvitor në një pjesë tjetër të vendit që e përdorin kur luajnë ndeshje jashtë vendit. Gjithashtu është duke u planifikuar rinovimi i stadiumit ku luajnë. Gjithsesi, mund të themi se kur e krahasojmë me Poloninë, nuk po flasim për një akademi moderne, mbresëlënëse. Por edhe sikur Kostadinov të na thoshte se në Maqedoni klubet shpesh kanë probleme qoftë edhe me një fushë me një terren të mirë. Shkëndija nuk ka probleme të tilla. Financat, nga ana tjetër, tërheqin trajnerë të rëndësishëm. Dhe Bruno Akrapoviç pohon se trajnerët në vendet e ish-Jugosllavisë janë “Zibi TOP”.
– Nga Jugosllavia vijnë shumë trajnerë shumë të mirë. Kjo, nga ana tjetër, ndikon në faktin që lojtarët e mirë rriten në këtë rajon të botës. Trajnerët nga ish-Jugosllavia janë shumë të disiplinuar dhe i kushtojnë vëmendje teknikës. Ne kombinojmë edhe teknikën me taktikën, nuk humbim kohë duke vrapuar për të ndërtuar formën fizike. Ne kombinojmë gjithçka me taktikat, stërvitemi me intensitet të lartë, dhe falë këtyre mënyrave lojtarët mësojnë shpejt. Është një shkollë e vjetër, por topi nuk ka ndryshuar aq shumë. Ka risi teknike, loja është pak më e shpejtë, por bazat janë ende të njëjta.
Në të ardhmen e afërt mund të presim më shumë juniorë në ekipin e parë të klubit nga Tetova. – Më pëlqen të krijoj hapsira për lojtarët e akademisë në ekipin e parë. Që kur jam këtu, pesë akademikë kanë filluar të luajnë në ekipin e parë të Shkëndijës. Në një ndeshje kam vënë në lojë katër lojtarë të rinjë. Synonim të luanim si të rinj, por nuk supozohej se do të ishin kaq shumë. Dua të jap mundësi për futbollistët e rinj, sepse i shoh si motivim për zhvillim – shpjegon Akrapoviç.
Elezi dhe ëndrra e Premierligës. Rruga kalon nëpër Poloni?
Por le të kthehemi te Dashmir Elezi. Çfarë e ardhme e pret? Ai do të mund të largohet nga Maqedonia pas ditëlindjes së tij të 18-të. Tashmë dëgjojmë se për të vijnë njerëz nga Turqia dhe Holanda. Ne pyesim rreth lojtarit se si do ta shikonin një ofertë nga Polonia dhe dëgjojmë se për të është gjithashtu një treg interesant. Çdo ligë që i jep sulmuesit një kërcim dhe shije të ligave më të mira në Evropë, do të konsiderohet si një drejtim potencial transferimi. Edhe Bruno Akrapoviç beson se Elezi duhet të zhvillohet gradualisht, hap pas hapi.
– Rruga më e mirë për Dashmirin do të ishte kalimi në liga si ajo austriake apo belge. Më vonë mendoj se ai duhet të provojë Spanjën ose Italinë. Nuk mendoj për Gjermaninë, as për Anglinë, janë më shumë liga fizike, në Francë gjithashtu do të përballej me lojtarë shumë të fortë. Ai duhet të udhëhiqet mirë dhe mendoj se mund ta bëjë këtë.
Dhe interesohet për veten? Ai ka ëndrrat e tij.
– Unë fokusohem në punën time në Shkëndijë. Dëgjoj trajnerin që më thotë se çfarë të bëj për të qenë i suksesshëm, për të shënuar më shumë gola. Ndoshta një ditë falë kësaj do të jem në gjendje të shoh veten në një klub të madh. Ëndrra ime është të luaj në Premier League. Unë jam mbështetës i Liverpool-it, më pëlqen stili i kësaj skuadre – na tregon Elezi.
Tani lojtari do të luftojë që Shkëndija e Tetovës të mbrojë titullin në kampionatin e Maqedonisë së Veriut. Kampionët e Maqedonisë janë tetë pikë prapa Shkupit, por faza cilësore përgatitore duhet të kontribuojë që skuadra e Bruno Akrapoviçit të ndjekë me sukses kryesuesin e tabelës. Duke marrë parasysh efikasitetin e Elezit në ndeshjet miqësore – përveç takimeve me skuadrat polake, ai shënoi edhe në ndeshjen e tretë kontrolluese dhe duket se futbollisti 17-vjeçar mund të luajë një rol të rëndësishëm në këtë ndjekje.
