Java e 15-të në elitën e futsalit vendor nisi me derbin lokal, Futsal Shkupi – Juventus Serava. Ndeshja në fjalë u zhvillua në palestrën “Enver Idrizi” në lagjen e Seravës, aty ku sërish ligjin bënë “bardhekaltërit” e Zoran Lekiq, që në fund shënuan fitore 9:3.
Njeriu i ndeshjes ishte Ismet Ceka, që realizoi 4 gola, Eljesa Neziri shënoi 2 gola, ndërsa nga një gol shtuan edhe Zoran Leveski, Aleksandar Gligorov dhe Erkan Shabani. Ky i fundit realizoi një super gol, me goditje nga distanca, për të paralajmëruar edhe një tjetër të shënuar nga Eljesa Neziri, i cili vendosi njëherit edhe rezultatin përfundimtarë të këtij takimi.
Në anën tjetër për Juventus Seravën, të saktë u treguan Osman Mustafa, Berkan Alce dhe Furkan Shabani, të cilët shënuan që në pjesën e parë, që u mbyll me shifrat 3:3.
Pas 15 xhirove, Futsal Shkupi me 38 pikë mban aktualisht pozitën e dytë, pas FC Arben Bajramit të vendit të parë (40 pikë), ndërkohë Juventus Serava mbetet në pozitën e 5-të me 24 pikë. (infOSport.mk)
