Agim Ibraimi po kalon momente shumë të mira me Kukësin, teksa po ndihmon vazhdimisht këtë skuadër në arritjene rezultateve pozitive, njofton “infOSport.mk”. Ibraimi doli të jetë protagonist edhe në takimin e sotëm të javës së 16-të kundër Bylisit, në të cilën ndeshje Kukësi shënoi fitore 2:1.
Ibraimi shënoi golin e parë për ekipin kuksian në minutën e 40-të, kur në ato momente arriti që të barazojë rezultatin në 1:1, pas golit të epërsisë së mysafirëve me anë të Stojanoviç, derisa për fitoren e Kukësit u përkujdes sulmuesi Eze, i cili realizoi në minutën e 57-të.
Për sulmuesin nigerian ishte ky goli i 8-të sezonal, po aq sa numëron edhe Agim Ibraimi, me ç’rast kjo dyshe së bashku edhe me Ardit Hoxhajn e Vllaznisë kryesojnë listën e golashënuesve në Superligën shqiptare.
Përveç Agim Ibraimit, te Kukësi titullarë në takimin e sotëm kundër Bylisit u paraqit edhe Besir Demiri, si dhe ish futbollisti i Shkëndijës, Gjelbrim Taipi, që u zëvendësua në minutën e 79-të nga Lulaj.
Kukësi pas 16 javëve kampionat renditet në pozitën e katërt me 23 pikë të tubuara, 13 më pak se Vllaznia e vendit të parë, që në këto momente po luan pa gola kundër Kastriotit. (infOSport.mk)
