UEFA zbulon kandidatët kryesor për lojtarin dhe trajnerin më të mirë të edicionit të kaluar

UEFA ka publikuar kandidatët finalë për çmimet e sezonit 2019-2020 në nivel klubesh.

Kështu për “Çmimin e lojtarit më të mirë të UEFA-s”, për sezonin që lamë pas do të konkurrojnë portieri dhe njëherit kapiteni i Bajernit të Munihut, Manuel Nojer, bashkëlojtari i tij, Robert Levandovski, si dhe mesfushori i Mançester Sitit, Kevin De Brujne.

Ndërkohë, sa i përket trajnerit më të mirë, një gjë është e qartë, pasi ky çmim do të shkojë në Gjermani, mirëpo mbetet të shihet se cili prej 3 trajnerëve gjerman të nominuar do ta fitojë të njëjtin. Në konkurrencë për këtë çmim prestigjioz, janë Jurgen Klop i Liverpullit, Hans Diter-Flik i Bajern Munihut dhe tekniku i Lajpcigut, Jurgen Nagelsman.

Ceremonia e ndarjes së çmimeve do të mbahet në 1 tetor, kur do të hidhet dhe shorti për ndarjen e grupeve të Ligës së Kampioneve.