Kristal Abazaj transferohet në Turqi. Futbollisti 24-vjeçar, i cili sezonin e kaluar ishte e pjesë e Kukësit në formë huazimi nga Anderlehti, sipas burimeve të sigurta pranë “SuperSportit”, po kalon vizitat mjekësore tek Ankaraspori (ish-Osmanlispori), klub me të cilin ka rënë dakord për të nënshkruar për një sezon, me opsion rinovimi edhe për një vit, nëse arrihen objektivat sportive.
Zyrtarizimi është çështje orësh.
Ankaraspori luan në Ligën e Parë të Turqisë, nivelin e dytë më të lartë të futbollit të këtij vendi. Nëse do të sigurojë ngjitjen në Superligë në fund të sezonit, atëherë Abazajt i rinovohet automatikisht kontrata.
Kujtojmë se në të kaluarën në këtë klub ka luajtur për një sezon e gjysmë (gusht 2017-janar 2019) edhe sulmuesi i Kombëtares kuqezi, Sokol Cikalleshi, duke shënuar 14 gola në 26 ndeshje të kampionatit.
Abazaj është futbollisti shqiptarë i radhës që transferohet në futbollin turk, teksa vetëm pak ditë më parë firmosi për Erzurumsporin Armando Sadiku. Cikalleshi u bë pjesë e Konjasporit.
Ndërkohë për Menemensporin luajnë Gentian Selmani dhe David Domgjoni.
