Largimi i mesfushorit tetovar, Valon Et’hemi vijon të mbetet një çështje e hapur te Kukësi, me klubin dhe lojtarin që kanë pretendimet e tyre për kontratën, ndërsa fjalën e fundit do ta thotë tashmë Dhoma e Zgjidhjes së Mosmarrëveshjeve në FIFA.
“Panorama Sport” zbuloi në numrin e djeshëm se vetë lojtari ka bërë hapin e parë. Avokatët e mesfushorit kanë ngritur padi në FIFA kundër klubit dhe pritet që të jepet një vendim deri në fund të javës së ardhshme.
Kukësi bllokoi transferimin e Et’hemit te polakët e Zaglebie Lubin me pretendimin se kontrata e lojtarit skadonte pas mbylljes së angazhimit të klubit në Kupat e Europës.
Përfaqësuesit ligjorë të lojtarit kanë paditur Kukësin në FIFA, duke e cilësuar kontratën abuzive.
Padia është bërë për shkak të mosdhënies së lejekalimit, duke qenë se futbollisti pretendon që kontrata i ka skaduar në momentin kur ka përfunduar sezoni 2019-2020 dhe jo kur mbyllet angazhimi i Kukësit në Europë.
Gazeta kontaktoi dje zyrën juridike të klubit verilindor, më konkretisht avokatin Arsen Selmanaj, i cili merret prej vitesh me kontratat e lojtarëve të Kukësit.
I pyetur për çështjen e Et’hemit dhe hapat që ka ndërmarrë klubi, Selmanaj sqaroi se edhe Kukësi ka gati padinë për lojtarin në FIFA.
“Së pari, si jurist më duhet të sqaroj se kontrata e lidhur rregullisht ka forcën e ligjit për palët dhe ajo mund të prishet ose të ndryshohet me pëlqimin e ndërsjellë të palëve ose për shkaqe të parashikuara në ligjet e Kodit Civil. Për çështjen në fjalë, ne si klub kemi filluar përgatitjet e padisë me të gjitha pretendimet tona. Sapo ta përfundojmë, do ta depozitojmë përpara organeve të FIFA-s”, është shprehur fillimisht përfaqësuesi ligjor i klubit kuksian.
MASAT PËR LOJTARIN
Pasi bllokoi transferimin e Et’hemit në Poloni, klubi i kërkoi zyrtarisht lojtarit të paraqitej në stërvitje për të vazhduar me Kukësin edhe në Liga Europa, mirëpo, diçka e tillë nuk ndodhi.
Et’hemi nuk pranoi të kthehej në skuadër, duke vazhduar stërvitjen individuale deri në zgjidhjen e çështjes nga FIFA.
“Lojtarit i kemi bërë disa paralajmërime. Pas këtyre paralajmërimeve për t’iu bashkuar ekipit, u detyruam të zbatojmë rregulloren e brendshme dhe kontratën. Pra, duke e penalizuar me gjobë lojtarin për mungesën në stërvitje. Padia në FIFA? Ethemi është në të drejtën e tij ligjore të ndërmarrë të gjithë hapat që i njeh ligji. Ne si klub ndjekim hapat tanë”, deklaroi Selmanaj për “Panorama Sport”.
Ndërkohë, vlen të theksohet se Et’hemit iu ofrua rinovimi i kontratës nga Kukësi, por ai refuzoi ofertën dhe vendosi të priste përfundimin e sezonit, në mënyrë që të largohej me parametra zero.
Mbetet për t’u parë se si do të zgjidhet kjo mosmarrëveshje për kontratën që kanë nënshkruar tri vite më parë.
