Futbollisti tetovar, Valon Et’hemi i ka dhënë fund aventurës së tij me Kukësin. Një ndër futbollistët më të mirë te skuadra nga Verilindja e Shqipërisë, autorë i 7 golave në edicionin e fundit, ka zyrtarizuar ndarjen me nënkampionët e Shqipërisë, në një postim emocionues të bërë në rrjetet sociale.
“Vlerësim dhe mirënjohje për tre vitet me KF Kukësin. Faleminderit të gjithëve atyre që bënë të ndjehem te Kukësi si në shtëpinë time. Mirënjohje pafund për tifozeët e Kukësit, të cilët më pranuan dhe bënë të ndihem si pjesë e tyre.
Faleminderit drejtuesve të klubit, menaxhmentit dhe gjithë trajnerëve me të cilët bashkëpunova tre vitet e fundit, për mundësinë e dhënë që të përfaqësoj Kukësin dhe të kontribuoj për tre vite rresht për fanellën e kësaj skuadre.
Vlerësim i pafund për bashkëlojtarët! Ata janë vëllezërit e mi. Të jetoja këtë aventurë bashkë me ata çuna, më ka bërë të ndjej dashurinë e vërtetë për futbollin.
Jam falemenderues dhe mirënjohës që pata mundësinë të isha pjesë e këtij klubi. Pengu i vetëm më mbetet fakti që nuk mundëm të fitojmë titullin kampion, por uroj Kukësin ta fitojë shumë herë në të ardhmen, duke filluar nga sezoni që pason.
Të nderuar miq në përgjithësi dhe tifozë të KF Kukësit në veçanti, për arsye profesionale kam vendosur të largohem për të provuar veten në një kampionat më konkurrues. Të dashur kuksianë, ishte kënaqësi të isha njëri prej jush.
Do të mbetem gjithmonë tifoz i Kukësit dhe uroj shumë suksese në të ardhmen. Tani është koha për një aventurë të re. Me shumë dashuri, Valoni“, – ka shkruar 22-vjeçari në profilin e tij zyrtarë në facebook.
Ndryshe Et’hemi, me fanellën e Kukësit numëron gjithsej 112 ndeshje, ku ka regjistruar edhe 14 gola dhe 11 asiste. Ai pjesë e Kukësit ishte që nga vera e vitit 2017-të, kur si 19-vjeçar kishte arritur nga rradhët e KF Adriatikut.
