Ditët kalojnë dhe situate e shkaktuar nga pandemia globale e “Covid-19” vijon të jetë shqetësuese, ndaj edhe në UEFA janë vënë në lëvizje për të studiuar mënyrat se si mund të çojnë deri në fund të gjitha ligat për klube.
Kështu duke qenë se përparësi është dhënë për ligat kombëtare, qeveria europiane e futbollit po mendon një plan për të mbyllur sa më shpejt edhe Ligën e Kampionëve dhe Liga Europa, ndaj së fundmi në tryezë po diskutohet një ide mjaft interesante.
E njëjta parashikon që pjesa e mbetur e kompeticioneve të vijojë me vetëm një ndeshje mes skuadrave dhe të gjithë takimet të zhvillohen në një qytet të vetëm, që ka kapacitete për të pritur sfida të këtij niveli.
Opsioni më konkret për Ligën e kampionëve është Stambolli, qytet i parashikuar për të pritur finalen, ndërsa më datën 23 pritet të merret edhe një vendim konkret për këtë çështje, gjatë një konferencë online mes UEFA-s dhe drejtuesve të Shoqatës së Klubeve europiane.
