Liverpulli kthehet në skenën e triumfit më dramatik në histori të veten sonte, kur do të përballet me Çelzin në Super Kupën e UEFA-s, finalen e parë të një gare të meshkujve të UEFA-s që do të referohet nga një grua.
Për çdo tifoz të Liverpullit, Stambolli sjell kujtime nga rikthimi dramatik në finalen e Ligës së Kampionëve kundër Milanit në vitin 2005, kur kishin qenë duke humbur 3:0 e në fund kishin qenë ata që e kishin ngritur trofeun lart për shkak të një rikthimi dramatik, transmeton Express.
Super Kupa është më shumë sesa vetëm një hapje ceremoniale për sezonin e ri evropian.
Fitorja këtu mund t’ia japë fituesit të Ligës së Kampionëve, Liverpullit, ose fituesit të Ligës së Europës, Çelzit, një motivim të madh për pjesën tjetër të sezonit.
Për Liverpullin e Jurgen Klop, kjo është një mundësi e mirë për ta vazhduar fillimin e mirë të sezonit, pasi që ata e mposhtën me rezultat 4:1 Noruiçin në ditën hapëse të Premierligës, të premten.
Në anën tjetër, Çelzi dëshiron të kthehet fuqishëm pas disfatës 4:0 kundër Mançester Junajtedit, mirëpo trajneri i ri, Frank Lampard, do të duhet ta nisë lojën me një skuadër pa mesfushorin N’Golo Kante, për shkak të një lëndimi të cilin trajneri e quan të vogël.
Vetëm një ndeshje në sezonin e ri është herët për një krizë lëndimesh, megjithatë, pasi portieri i parë, Alison, e pësoi një lëndim të premten, trajneri Klop mbeti me lojtarin e ri, Adrian, si portier të vetëm në dispozicion, pasi që edhe dy opsionet e tjera për këtë pozitë janë të lënduar.
Liverpulli është i pamposhtur kundër klubeve angleze në Europë gjatë gjashtë ndeshjeve të fundit, që nga viti 2009, kur e kishin pësuar një disfatë në kuadër të çerekfinaleve të Ligës së Kampionëve kundër Çelzit.
Kjo ndeshje do të jetë vetëm rikujtim se sa dominuese ishin klubet angleze në sezonin e kaluar në Evropë. Katër klube nga Premierliga i zunë katër vendet në finalet e Ligës së Kampionëve dhe Ligës së Evropë.
Liverpulli ishte fituesi i fundit anglez i Super Kupës para 14 vjetëve, kur u përball me CSKA Moskën, mirëpo kjo do të jetë hera e parë që kjo ndeshje zhvillohet në mes të dy klubeve nga Anglia.
Çelzi e fitoi këtë kupë kundër Real Madridit në vitin 1998, mirëpo humbi kundër Atletiko Madridit në vitin 2012 dhe Bajern Munihut një vit më vonë.
Klubet spanjolle i kanë fituar pesë Super Kupat e fundit, katër prej të cilave ishin me të dyja klubet nga Spanja.
