Shkëndija e Tetovës ka shënuar edhe fitoren e 20-të sezonale, duke ecur me hapa të sigurtë drejt titullit të dytë rresht kampion dhe të tretit në histori, njofton “infOSport.mk”. Skuadra tetovare në ndeshjen e javës së 29-të mundi Makedonija GJ.P me rezultatin 4:2, fitore kjo e 10-ta me rradhë në 13 ndeshjet e fundit ndaj skuadrës nga Gjorçe Petrovi.
Trajneri Qatip Osmani vendosi që sulmin t’ia besojë Marjan Radeskit, dhe nuk gaboi, pasi i njëjti ishte superior në 30 minutat e para të takimit, kur edhe shënoi dy golat e parë për Shkëndijën.
Golin e parë sulmuesi me origjinë nga Prilepi e realizoi në minutën e 8-të, kur me kokë nga afërsia shënoi në rrjetën e Marko Jovanovskit, ndërsa sërish me kokë, por kësaj rradhe nga një distancë paksa më e largët Radeski shënoi edhe në minutën e 30-të.
Këtu nuk ishte fundi i golave të shënuar gjatë pjesës së parë, pasi në minutën e 40-të pas një super aksioni të gjatë, Omar Imeri shënoi edhe për 3:0.
Pas një kundërzbritje të shpejtë, Dejan Tanturovski në minutën e 59-të ngushtoi epërsinë e Shkëndijës në 3:1, ndërsa vetëm 3 minuta më vonë, braziliani Gama për shkak të kartonit të dytë të verdhë duheshe që të lëshojë fushën.
Kjo bëri që Shkëndija në minutën e 87-të me anë të Visar Musliut të shënojë edhe golin e katërt, ku sërish në rolin e asistuesit doli të jetë Agim Ibraimi, si në rastin e shënimit të golit të parë të Radeskit.
Krejt fare në fund Makedonija GJ.P shënoi edhe golin e dytë, që ishte pjesë e brazilianit Paulo Eduardo Karvaljo në minutën e 90-të.
Shkëndija pas 29 javëve numëron 66 pikë, 12 më shumë se Vardari që mban pozitën e dytë, ndërkohë Makedonija GJ.P me 35 pikë mbetet në pozitën e 7-të.
