Një moment interesant është regjistruar në “Kamp Nou” në sfidën e Ligës së Kampionëve mes Barcelonës dhe Mançester Junajtedit.
Janë të shumta mënyrat që trajnerët kanë gjetur për të udhëzuar futbollistët në fushë për strategjitë ndaj kundërshtarit apo lëvizjet e skemave gjatë lojës.
Një përpjekje të tillë ka bërë dhe trajneri i Junajtedit, i cili ka shkruar një copë letër teksa ia ka dorëzuar Rashford, por sulmuesi nuk është treguar i kujdesshëm teksa e ka humbur pas një dueli me Zherard Pike.
Me letrën e cila ka rënë në hyrje të zonës “katalunas”, portieri Ter Shtegen nuk ka rezistuar dot dhe është afruar për të parë se çfarë kishte shënuar tekniku i ‘Djajve të Kuq’, duke “spiunuar” kështu në një farë mënyre kundërshtarët.
Në letër ishte një udhëzim ndaj skuadrës për të ndryshuar rreshtimin në fushë, por letra përfundoi në duart e gabuara. Një moment që nuk është humbur nga telekamerat teksa video e gardianit të Barcelonës është kthyer virale në rrjetet sociale.
