Dy skuadrat gjigande europiane, Reali i Madridit dhe Mançester Junajtedi janë vënë pas mbrojtësi brazilian të Portos, Eder Militao. Edhe pse ky i fundit po zhvillon vetëm sezonin e tij të parë në futbollin europian, falë paraqitjeve të tij mbresëlënëse me fanellën e skuadrës portugeze në vitin e tij debutues, ai tashmë ka zgjuar edhe interesimin e skuadrave të njohura europiane.
20-vjeçari Militao te Porto arriti verën e kaluar nga rradhët e skuadrës braziliane të Sao Paulos për shumën e 8 milion eurove, ndërsa ka gjasa që ai të ndryshojë mjedis që në merkaton e janarit.
Trajneri i ri i Mançester Junajtedit, Ole Gunar Solskjaer e shikon si përforcimin ideal të ekipit, ndërsa Real Madridi kërkon të bëjë një investim të rëndësishëm për të ardhmen.
Çmimi aktual i Eder Militao është 20 deri në 25 milionë euro, por një ankand mes klubeve mund ta çonte në 40 milionë euro vlerën e kartonit të brazilianit.
