Renova që ndodhet në një krizë të rezultateve sot në kuadër të javës së 6-të në elitën e futbollit vendor do të mirëpret Bellasicën, skuadër kjo që në anën tjetër ende nuk ka shijuar asnjë fitore në 5 xhirot e para, njofton “infOSport.mk”.
Që të dyja skuadrat do të bëjnë çmos që në këtë ndeshje të arrijnë deri tek fitorja, ndërsa e gjithë kjo paralajmëron një ndeshje të hapur në Tetovë, aty ku Renova në dy xhirot e para ka marrë vetëm një pikë dhe ka shënuar një gol në barazimin e fundit ndaj Makedonija Gj.P. (1:1).
“Na mungojnë rezultatet, ashtu që sot përballë Bellasicës futemi në lojë vetëm për maksimumin e pikëve. Kena punuar mirë gjatë gjithë javës, ashtu që besoj se me një lojë të mirë në fund do të arrijmë ti marrim 3 pikët e plota” – u shpreh Fisnik Zuka në prononcimin e tij për “infOSport.mk”.
Trajneri i Renovës, Jeton Beqiri në këtë ndeshje nuk do të mund të llogarisë në shërbimet e mbrojtësit standard Xhelil Abdullah, i cili në ndeshjen e fundit kampionale ndaj Pobedës në Strumicë u ndëshkua me të kuq. Pjesa tjetër e skuadrës të gjithë janë të gatshëm për të dhënë më të mirën, njëjtë sikurse edhe futbollistët e Bellasicës, që në dy xhirot e fundit kanë marrë dy barazime ndaj skuadrave shkupjane Vardarit (1:1), gjegjësisht Makedonija GJ.P (0:0).
