Kukësi eliminohet nga Liga Europa me kokën lartë. Skuadra shqiptare zhvilloi një super ndeshje sonte në “Elbasan Arena” përballë gjeorgjianëve të Torpedo Kutaisi, duke i mundur ata me rezultatin 2:0, mirëpo edhe kjo fitore nuk mjaftoi që kuksianët të vazhdojnë aventurën europiane, njofton “infOSport.mk”.
Kjo për shkak se Kukësi në ndeshjen e parë në transfertë ishte mundur me rezultatin 2:5, duke u eliminuar në këtë mënyrë me rezultatin e përgjithshëm, 4:5.
Ndryshe të dy golat për Kukësin sonte i realizoi Rexhinaldo, që të dy nga penaltia, të përfituar në mënyrë individuale. Golin e parë ish sulmuesi i Laçit e realizoi në minutën e 29-të, teksa golin e dytë në minutën e 75-të.
Në 15 minutat e fundit të takimit Kukësi u kanos seriozisht edhe në tre raste të tjera, mirëpo në të gjitha këto fitues doli portieri mysafir, Kvaskhvadze, i cili ndali goditjet e Donjet Shkodrës, boshnjakut Harba dhe shkupjanit, Edis Maliqi.
Ish futbollisti i FC Shkupit luajti për gjatë 90 minutave, ndërkohë tetovari Valon Ethemi luajti deri në minutën e 52-të, kur u zëvendësua nga Çyrbja.
