Karlo Ançeloti dhe tifozeria e Napolit kanë mosmarrëveshje në lidhje me përforcimet e afatit kalimtar të verës. Arkadius Milik është një sulmues mjaft cilësor, por dëmtimet e shpeshta nuk japin garanci, që Ançeloti të bazohet vetëm te ai për të përballuar sezonin me Napolin.
Pikërisht për këtë arsye, “napolitanët” janë hedhur në kërkim të një tjetër sulmuesi me peshë, që do të mund të ofronte gola të shumtë dhe të rriste konkurrencën në sulm.
Emri i preferuar nga Karlo Ançeloti është ai i francezit Karim Benzema, që vështirë se do të vijojë të qëndrojë më te Reali, ndërsa tifozëria “napolitane” ëndërron rikthimin e Edison Kavanit.
Uruguaiani nuk ka më qetësinë e mëparshme te PSZH-ja dhe do të mirëpriste një rikthim në Itali, te Napoli, por që kjo të ndodhë, duhet të sakrifikojë disa miliona në pagën e tij vjetore, transmeton “Top Channel”.
Gjithsesi, koha kalon dhe pas një muaji skuadrat do të zbresin në fushë për javën e parë të kampionatit, ndaj Ançeloti kërkon që skuadra të veprojë sa më shpejt në merkato, për të kompletuar ekipin.
Por ajo që është më e rëndësishme, është fakti se me ardhjen e Ançelotit, Napoli është bërë një destinacion i preferuar edhe për lojtarët e mëdhenj, jo vetëm për talentet e reja.
