Me Memedin në krye Renova tashmë synon Europën (VIDEO)

Renova ka shënuar fitore 2:1 ndaj Akademia Pandev, duke u rikthyer kështu në lojë për një vend në Europë, njofton “infOSport.mk”. Kur kanë mbetur edhe 6 javë deri në mbyllje të sezonit, “gjipspunuesit” tashmë kanë vetëm dy pikë më pak se skuadra e vendit të katërt në tabelë, Rabotniçki, pozitë kjo që skuadrave pretenduese mund të ju sigurojë një vend për në ndeshjet e Liga Europa, gjithnjë nëse Shkëndija triumfon në finalen e Kupës së Maqedonisë përballë Pelisterit.

Gjithçka interesante në ndeshjen e sotme në Tetovë ndodhi në pjesën e dytë, kur edhe u shënuan të tre golat. Nenad Mishkovski reagoi më së miri në zonën e mysafirëve në minutën e 69-të, kur nga afërsia mposhti portierin mysafir Istatov, teksa vetëm 5 minuta më pas, Valmir Nafiu pas një solo aksioni nga një kënd shumë i vështirë arriti që të mposht edhe për herë të dytë portierin mysafir në këtë ndeshje.

Megjithatë momenti më i bukur  këtij takimi ndodhi në minutën e 85-të, të takimit kur rezervisti Daniel Milovanoviç me një super gol nga distanca ngushtoi epërsinë e vendasve, mirëpo që në fund ky gol u tregua edhe si i fundit në këtë sfidë, pas së cilës Renova tashmë me 40 pikë renditet në pozitën e 5-të dhe me gjasa reale që deri në fund të sezonit të shpresoj për Europën.

Në anën tjetër Akademia Pandevi nga një skuadër surprizë e stinorit vjeshtor, tashmë do të duhet të luftojë për mbijetesë, pasi është vetëm 4 pikë larg pozitës së 8-të, të balotazhit.