Alesandro Kostakurta është rikthyer të flasë për trajnerin e ardhshëm të Italisë, teksa ka dhënë edhe një datë kur pritet të bëhet zyrtarizimi.
Ish mbrojtësi i Milanit, që ka detyrën e gjetjes së një komisari teknik, ka vlerësuar edhe trajnerin e përkohshëm, Di Biaxho, pavarësisht se Italia e tij humbi në miqësoren ndaj Argjentinës.
“Xhixhi është një trajner serioz, i përgatitur dhe kompetent. E ardhmja e tij është e ditur tashmë, ose do të jetë trajner i parë, ose do të jetë pjesë e stafit të kombëtares. Këtë do ta mësoni më 20 Maj, mbajeni mend këtë datë”, tha Kostakurta.
Më tej ish mbrojtësi i Milanit dhe Italisë, foli edhe për paraqitjen e të “axurrëve” në miqësoren e humbur 0:2 ndaj Argjentinës, në Mançester.
“Ishte një ndeshje e vështirë dhe në këto momente ishte thuajse e pamundur të bëhej më mirë. Duhet pak kohë për të kaluar ngërçin psikologjik që la eliminimi nga Botërori. Në këto rrethana, as Guardiola e Murinjo nuk do të mund të bënin më mirë se Di Biaxho, ndaj them se jam i kënaqur me paraqitjen”, – u shpreh Kostakurta.
