Struga TL ndalet nga Teteksi, e ndëshkojnë dy futbollistët shqiptarë Sylaj dhe Jonuzi

Struga Trim Lum me disfatë ka nisur stinorin pranveror në Ligën e Dytë – Perëndim, njofton “infOSport.mk”. Skuadra strugane pësoi disfatë në Tetovë nga Teteksi me reuzltatin 2:0, ndërsa firmën e golave mbajnë dy futbollistë shqiptarë Briliant Sylaj dhe Valmir Jonuzi.

Që të dy futbollistët e transferuar gjatë merkatos së janarit, njëri nga Gostivari, e tjetri nga Makedonija Gj.P u treguan deçiziv në fitoren e 6-të, të këtij edicioni për Teteksin, që tashmë ka parakaluar në tabelë Lokomotivën, skuadër kjo që pësoi disfatë minimale 1:0 në transfertën ndaj Labunishtës në Strugë, për të cilën skuadër golin e vetëm të vlefshëm tre pikë e realizoi Ilija Dalçeski.

Fitore identike 1:0 falë golit të shënuar nga Filip Petrov në minutën e fundit të takimit regjistroi edhe Makedonija Gjorçe Petrovi përballë Novacit, teksa ndeshja ndërmjet Zajazit dhe EuroMilkut u anulua për shkak terenit të mbushur me ujë të stadiumit në qytetin e Kërçovës.