Treshja nga Maqedonia, Ferid Agushi, Dragan Petroviç dhe Taulant Ismaili, si duket janë të lindur për trofe. Pas shumë trofeve të fituar në futsalin e Maqedonisë, ata tashmë një gjë të tillë po bëjnë edhe në futsalin kosovar, njofton “infOSport.mk”. Agushi, Petroviç dhe Ismaili gjatë këtij sezoni braktisën ekipin e Velesit dhe iu bashkuan skuadrës kosovare të Feniksit nga Drenasi, me të cilën skuadër të shtunën në mbrëmje triumfuan në Kupën e Kosovës.
Në ndeshjen e zhvilluar në Pallatin e Rinisë në Prishtinë, Feniksi në ndeshjen finale me rezultatin e thellë 6:0 mundi Besën e Pejës, për të cilën skuadër luajti një tjetër lojtar nga Maqedonia, Orhan Ibishi, i cili gjatë kësaj merkatoje dimri nga rradhët e skuadrës kampione të Futsal Shkupit iu bashkua skuadrës pejane.
Vlen të ceket se gjysmën e golave në ndeshjen e mbrëmshme finale i realizoi kjo treshe, me Agushin që shënoi një dopietë dhe një tjetër goli të shënuar nga ana e Petroviç, teksa në listën e golashënuesve për skuadrën e Feniksit, gjithashtu u regjistruan edhe Mejzini, Topilla dhe Ibrahimi.
Është ky trofeu i parë i Feniksit gjatë këtij sezoni, që me Ismailin, Agushin dhe Petroviçin në skuadër, shihet edhe si një ndër pretendentët kryesor për titullin e kampionit në Kosovë.
