Barcelona është ndalur me barazim 1:1 nga Espanjolli në kampionatin spanjol, La Liga. Në fakt, Barcelona zbriti në fushë me një rotacion, duke lënë Messin e shumë titullarë të tjerë në stol, e duke i dhënë mundësinë e debutimit zyrtar Coutinhos me fanellën “blaugrana”. 45 minutat e para u mbyllën në barazim, me rrjeta të paprekura.
Në pjesën e dytë të ndeshjes, ishte Espanyoli që gjeti rrugën e golit, me anë Morenos, kur akrepat e orës shënuan pak më shumë sesa një orë lojë, në një kohë që Valverde kishte hedhur në fushë edhe yllin e ekipit, Leo Messin.
Gjithsesi, “blaugranat” nuk u dorëzuan dhe falë “pleshtit”, që kontribuoi me një asist për mbrojtësin shtatlartë Gerard Pique, arritën të barazonin shifrat në 1-1.
Tashmë Barcelona kryeson me 58 pikë, 12 më shumë sesa Atletico që duhet të zhvillojë ndeshjen e saj, e plot 19 nga rivalët e përjetshëm të Realit të Madridit, ndërsa Espanyoli humbi dy pikë në betejën për mbijetesë, edhe pse është e distancuar me 8 pikë nga zona e ftohtë.
