Klubi i Futsalit, Shkëndija nga Tetova ka bërë surprizën më të madhe në ndeshjet e 1/8 së finales së Kupës së Maqedonisë në futsal, duke eliminuar liderët aktual të Ligës së Parë, Velesin, njofton “infOSport.mk”.
Ishte kjo një super ndeshje, në të cilën djelmoshat “kuq e zi” që nga fillimi ishin të vendosur për të arritur diçka të madhe në këtë ndeshje, dhe në fund edhe i’a arritën qëllimit, duke eliminuar fituesin e vitit të kaluar të Kupës së Maqedonisë në futsal. Shkëndija shënoi fitore me rezultatin 13:10, në një ndeshje ku shkëlqyen lojtarët si Elvir Nurishi, Altin Salihi, Besar Abduli dhe Meriton Halili.
Shkëndija fitoren e siguroi gjatë pjesës së parë, të cilën e mbylli me rezultat 6:3, ndërsa në pjesën e dytë që të dyja skuadrat shënuan nga 7 gola, edhe pse në një moment Shkëndija arriti të avansojë edhe me 5 gola dallim (11:6).
Është kjo një ndër fitoret më të mëdha të skuadrës tetovare që aktualisht garon në Ligën e Dytë të Futsalit, duke bërë që Kupa e Maqedonisë këtë vit të ketë një emër të ri të fituesit.
