Rajan Gigs është emëruar në postin e trajnerit të Uellsit, për 4 vitet e ardhshme. Ish-anësori i Mançester Juajtedit, 44-vjeçari Gigs pason Kris Koleman, që u largua në muajin nëntor për të marrë drejtimin e Sunderlandit.Ndihmësi i Koleman, Osian Roberts, ish-sulmuesi uellsian Kraig Bellamy dhe Mark Boven ishin kandidatët e tjerë për të marrë drejtimin e kombëtares uellsiane.
Gigs ka qenë objektiv prej një kohe të gjatë i Federatës uellsiane të Futbollit (FAW) dhe ishte pretendenti kryesor për postin pas largimit të Kolemanit, pasi Uellsi dështoi të kualifikohej në Botërorin e këtij viti në Rusi.
Federata uellsiane e konfirmoi emërimin përmes rrjeteve sociale, ndërsa Gigs, përmes një deklarate tha se “ishte shumë krenar që iu dha mundësia të drejtonte ekipin kombëtar të Uellsit”.
“Sfidat që kemi përpara në Ligën e Kombeve dhe kualifikueset për Euro 2020 më ngacmojnë jashtë mase dhe përbëjnë realisht një bast të vështirë. Mezi pres të filloj punën me lojtarët, për t’u përgatitur për ndeshjet që do të zhvillojmë më vonë gjatë këtij viti”, – tha Gigs.
