Muhamed Useini pa dyshim se ka qenë një ndër goditjet më të qëlluara të bëra nga ana e trajnerit, Shpëtim Duro në fillim të sezonit aktual, kur vendosi që ta merrte Metin nga radhët e Renovës. Ai u ambientua shumë mirë te skuadra vlonjate, duke përfituar shumë shpejtë një vend titullari si dhe zemrat e tifozëve për shkak karakterit të tij luftarak.
Mesfushori tetovar aktualisht me skuadrën e tij ndodhet në Antalia të Turqisë, ku po zhvillojnë fazën kryesore të përgatitjeve për sezonin pranveror në Superligën shqiptare, ku aktualisht Flamurtari mban pozitën e dytë menjëherë pas Skënderbeut.
Meti në një prononcim për “infOSport.mk” nuk deshi të flas për kampionatin shqiptarë dhe gjasat e tyre për titullin e kampionit, mirëpo është i sigurtë se skuadra e tij po të garonte në Ligën e Parë Futbollistike të Maqedonisë do të konkurronte për titullin e kampionit, së bashku edhe me dy skuadrat udhëheqëse, Shkëndijën dhe Vardarin.
“Kemi super skuadër, besoj që me këtë ekip sigurtë do ishim lartë në Maqedoni, në Top3 me Shkëndijën dhe Vardarin”- u shpreh fillimisht enkas për “infOSport.mk”, Mmuhamed Useini, i cili edhe pse luan larg vendlindjes së tij, tha se ndjehet sikur në shtëpi dhe se për një gjë të tillë ka kontribuar numri i madh i futbollistëve që kanë luajtur në futbollin tonë vendor.
