Fitojnë Skënderbeu dhe Partizani, ndalet Kukësi (VIDEO)

Skënderbeu vazhdon marshimin në Superligën shqiptare, teksa skuadra korçare pa shumë probleme sot në teren vendas mundi Teutën me rezultatin 3:1, njofton “infOSport.mk”.

Në këtë ndeshje te skuadra korçare fjalën kryesore e pati dyshja sulmuese, Soue dhe Xhejms që realizuan të tre golat, dy prej të cilëve ishin pjesë e të parit, teksa golin e nderit për mysafirët nga Durrësi e realizoi Dediç.

Fitore identike realizoi edhe Partizani i Sulejman Starovës, që tashmë mund të merr frymë më lirshëm. Skuadra nga kryeqendra shqiptare me rezultatin 3:1 mundi Vllazninë, edhe atë falë dy golave të shënuar gjatë pjesës së dytë, pasi pjesa e parë u mbyll me barazimin 1:1.

Laçi vazhdoi ecurinë pozitive, duke shënuar edhe një tjetër fitore 3:1 në ndeshjet e javës së 16-të, pasi mundi Lushnjën, ndërkohë fitore të pastërt 3:0 si mysafir regjistroi Flamurtari i Shpëtim Duros, që mundi Kamzën.

ISH BRAZILIANI I SHKËNDIJËS SHËNON NË FITOREN E FLAMURTARIT (VIDEO)

Surprizën e javës e bëri Luftëtari që në transfertë mundi Kukësin, skuadër kjo që tashmë ndodhet shumë larg pozitës së parë, që mbahet bindshëm nga Skënderbeu me 37 pikë, 9 më shumë se Flamurtari i vendit të dytë dhe 10 më shumë se Laçi në pozitën e tretë. Kukësi aktualisht ndodhet në pozitën e katërt me 25 pikë, i ndjekur nga Partizani me 24 pikë në pozitën e pestë dhe Kamza me 23 pikë në pozitën e 6-të.