Milani më në fund gjenë fitoren, fitojnë edhe Roma dhe Lacio (VIDEO)

Milani më në fund ka gjetur fitore në një ndeshje kampionale të Serie A. Të besuarit e trajnerit Vinçenco  Montella në kuadër të javës së 10-të mundën Kievon në transfertë me rezultatin 4:1, njofton “infOSport.mk”.

Kësisoj ata i dhanë fund serisë prej 4 ndeshjeve pa fitore, ku kishin regjistruar tre disfata dhe një barazim, atë të javës së 9-të ndaj Xhenoas në “San Siro”.

Për herë të fundit Milani kishte mundur ekipin e SPAL (2:0) si vendas me 17 shtator, ndërsa sonte për fitoren e 5-të sezonale u përkujdesën Suso (36’), Cezar (42’a.g), Çalhanoglu (55’) dhe Kaliniç (65’). Në anën tjetër golin e vetëm dhe të nderit për Kievon e realizoi një ish milanist, Valter Birsha (61’).

Fitore në kuadër të kësaj jave regjistroi edhe Roma që iu falë golit të shënuar nga Peroti që në minutën e 10-të nga penaltia përballë Krotones së Arlind Ajetit, i cili sonte nxehu bankinën.

Një fitore të rradhës dhe me shumë vlera arriti edhe Lacio e Thomas Strakoshës në transfertën ndaj Bolonjas, 1:2, teksa Kaljari në ndeshjen më interesante të mbrëmjes me dy gola të shënuar në minutat shtesë të takimit mundi Beneventon e Ledian Memushajt me rezultatin 2:1.