Izo shënon, por Shkëndija barazon (VIDEO)

Shkëndija nuk ka shkuar më shumë se një barazim në ndeshjen e javës së katërt përballë Pobedës nga Prilepi. Të dyja skuadrat zhvilluan një super ndeshje në stadiumin e qytetit në Tetovë, që në fund u mbyll me barazimin 3:3.

Ishte kjo një ndeshje me shumë kthesa, ku të dyja skuadrat krijonin epërsi, mirëpo që në fund nuk arrinin ta ruanin dot.

Najdovski me golin e shënuar në minutën e 16-të paralajmëroi se Pobeda në Tetovë ka ardhur për senzacion. Goli i tij në rrjetën e Zahov bëri që Shkëndija të këndellet dhe me anë të Izair Eminit në minutën e 30-të të barazojë shifrat në 1:1. Braziliani Zhunior mjaft mirë nga e majta harkoi në zonën kundërshtare, ku më së miri u gjind Izair Emini, i cili me kokë shnëoi për 1:1.

Deri në mbyllje të pjesës së parë Shkëndija arriti që të kthejë rezultatin në favorin e saj, falë golit të shënuar nga Besart Ibraimi nga pika e bardhë vetëm dy minuta para mbylljes së pjesës së parë.

Dhe kur të gjithë menduan se Shkëndija në pjesën e dytë do të vazhdojë në të njëjtin ritëm, ashtu nuk ndodhi pasi mysafirët nga Prilepi brenda 8 minutave të para shënuan dy gola të tjerë në rrjetën e Zahov.

Fillimisht Dejan Cvetanovski në minutën e 49-të barazoi shifrat në 2:2, teksa qendërsulmuesi veteran, Bllagoja Geshoski në minutën e 53-të, edhe për herë të dytë në këtë përballje kaloi në epërsi Pobedën.

Barazimin dhe një pikë nga kjo përballje, ku Shkëndija shihej si favorit absolut ia siguroi rezervisti Besart Abdurahimi, me golin e realizuar në minutën e 88-të.

Edhe përkundër këtij barazimi Shkëndija vazhdon të udhëheq tabelën e klasifikimit me 10 pikë të tubuara, dy më shumë se elisteri në pozitën e dytë që sot barazoi pa gola ndaj Skopjes.

Në dy ndeshjet tjera Shkupi me rezultatin 2:1 mundi Rabotniçkin, teksa Akademia Pandev me rezultatin minimal 1:0 mundi Renovën.