Maqedonia, bilanc pozitiv ndaj Shqipërisë

Të martën në Strumicë, Maqedonia do të ketë një përballje shumë të vështirë ndaj Shqipërisë, ndeshje kjo e vlefshme për eliminatoret e Botërorit “Rusi 2018”.

Ndeshja e 05 shtatorit do të jetë ndeshja e 10-të mes këtyre dy kombëtareve dhe vetëm e dytë zyrtare, pasi 8 ndeshje mes tyre këto dy kombëtare i kanë zhvilluar me karakter miqësorë, shkruan “infOSport.mk”.

Deri më tani Maqedonia është treguar më e suksesshme, duke arritur 4 fitore, kundrejt dy fitoreve të Kombëtares shqiptare, ndërsa tre ndeshje mes këtyre dy kombëtareve janë mbyllur me  barazime.

Vlen të theksohet se Maqedonia të gjitha fitoret i ka arritur në përballjet miqësore, teksa Shqipëria njërën prej fitoreve e ka arritur në ndeshjen e vitit të kaluar në Shkodër, në kuadër të eliminatoreve për Botërorin “Rusi 2018”.

Ndeshja e së martës është vetëm ndeshja e dytë zyrtare mes këtyre dy kombëtareve, tek të cilat mbizotëron një atmosferë pozitive pas atyre fitoreve në ndeshjet paraprake të grupit “G”.

Shqipëria mundi Lihtenshtejnin në Elbasan Arena me rezultatin 2:0, teksa Maqedonia në Haifa shënoi fitore minimale 1:0 ndaj Izraelit.

Mbetet të shohim se cili do të jetë epilogu i ndeshjes së nesërme në stadiumin “Mladost” që starton në ora 20:45.