Pas disa muajve bisedime, Izair Emini dhe drejtuesit e Besës së Dobërdollit kanë rënë dakord që ish kapiteni i kësaj skuadre, që ndryshe njihet edhe si njeriu kampion, të marrë postin e përgjegjësit në departamentin e sportit, njofton ekskluzivisht “infOSport.mk”.
Emini pikërisht te skuadra nga Dobërdolli kishte mbyllur karrierën e tij si futbollistë profesionistë, duke dhënë një kontribut të jashtëzakonshëm në inkuadrimin e Besës në Ligën e Parë, aty ku numëron plotë 192 ndeshje, 75 gola dhe 15 asistime.
I njëjti në Ligën e Parë, gjithashtu ishte shpallur plotë tre herë kampion me Shkëndijën, derisa në sezonin 2014/15 si pjesë e Renovës, ishte shpallur golashënues më i mirë i elitës.
Gjatë karrierës së tij, Emini gjithashtu me Shkëndijën kishte fituar edhe SuperKupën e Maqedonisë, gjë të cilën e kishte bërë edhe me Kukësin në Shqipëri, me të cilën skuadër gjithashtu kishte fituar edhe titullin kampion, por edhe Kupën e Shqipërisë.
Mirëpo këtu nuk është fundi i sukseseve të tij personale, pasi i njëjti në sezonin 2019/20, ishte shpallur kampion me Dritën e Gjilanit në Kosovë, ndërsa gjithashtu ishte shpallur kampion edhe me Shkëndijën, Voska Sportin dhe Besën e Dobërdollit në Ligën e Dytë, duke ndihmuar këto skuadra për të luajtur në mesin e më të mirëve.
Pikërisht një gjë të tillë edicionin e kaluar bëri edhe me Besën e Dobërdollit, te e cila skuadër gjithë këtë eksperiencë të bujshme, do të mundohet ta vazhdojë tashmë edhe në pozicionin e përgjegjësit për departamentin e sportit.
Duke parë ambiciet e drejtuesve të Besës së Dobërdollit, që janë ngritja e klubit në nivelet më të larta, mund të themi se kanë gjetur njeriun e duhur te Izair Emini, i cili me njohuritë e tij dhe lidhjet që ka krijuar deri më tani, pritet ta jap kontributin e tij në këtë drejtim. (infOSport.mk)
Trofetë e Izair Eminit gjatë karrierës së tij si futbollistë:
2009-2010 Kampion me Shkëndijën në LDFMV
2010-2011 Kampion me Shkëndijën
2010-2011 Fitues i SuperKupës së Maqedonisë me Shkëndijën
2014-2015 TopGolashënuesi më i mirë në LPFMV
2015-2016 Fitues i Kupës së Shqipërisë me Kukësin
2015-2016 Fitues i SuperKupës së Shqipërisë me Kukësin
2016-2017 Kampion me Kukësin
2017-2018 Kampion me Shkëndijën
2018-2019 Kampion me Shkëndijën
2019-2020 Kampion me Dritën
2022-2023 Kampion me Voska Sport në LDFMV
2023-2024 Kampion me Besën e Dobërdollit në LDFMV
Një kampion i lindur….
