![](http://www.infosport.mk/wp-content/uploads/2024/06/Shkupii.jpg)
FC Shkupi, që përgatitjet për sezonin e ri 2024/25 i ka vazhduar në Turqi, ka filluar të mendoj tashmë edhe rreth ndërtimit të skuadrës. Pas shumë largimeve, kjo skuadër tashmë ka filluar të bëjë edhe përforcimet e para, teksa siç mëson ekskluzivisht “infOSport.mk”, skuadra nga Çairi ka arritur akordin me mbrojtësin e krahut të majtë, Xhelil Asani.
Bëhet fjalë për një futbollistë 28-vjeçar, i cili dy vitet e fundit ka luajtur në Superligën shqiptare, derisa në futbollin vendor rikthehet pas 6 viteve e gjysmë, kur për herë të fundit kishte mbajtur veshur fanellën e Shkëndijës.
Ndryshe, Asani karrierën futbollistike e kishte nisur në vendlindjen e tij, te skuadra e Vëllazërimit nga Kërçova, për të luajtur më pas edhe me Metalurgun, ndërkohë skuadra e tij e parë jashtë kufijve të Maqedonisë, kishte qenë Bylisi nga Ballshi i Shqipërisë.
Karriera e tij kishte vijuar të zhvillohet jashtë vendit, duke luajtur në Malta, Bjellorusi, Uzbekistan, Bosnje e Hercegovinë, Rusi si dhe Amerikën e largët, pasi i njëjti posedon edhe pasaportë amerikane.
Tashmë Asani sërish rikthehet të luaj në vendin e të parëve të tij, mirëpo këtë herë me fanellën e FC Shkupit, me të cilën skuadër siç mësojmë, ka firmosur kontratë një vjeçare, me mundësi vazhdimi edhe për një vit tjetër.
Kujtojmë, pjesë e FC Shkupit në sezonin e ri do të jetë edhe Numan Ajetoviç, një ish junior i Vardarit, që së fundmi luante me Novacin në Ligën e Dytë. (infOSport.mk)